Ermənistanın Baş naziri Nikol Paşinyanın erməni ruhaniləri arasında keçmiş KQB zabitləri haqqında verdiyi açıqlamadan çaşqınlığını ifadə edən Zaxarova, gözlənilmədən düz yoldan saparaq Ulu Öndər Heydər Əliyevi xatırladıb.

Əvvəla, Rusiya XİN-nin ruporu Heydər Əliyevin hər hansı bir dini icmaların sıralarına daxil olmuş KQB agenti deyil, KQB-nin general-leytenantı və SSRİ dövründə Azərbaycanın lideri olduğunu məqsədli şəkildə unudur. Amma hətta bu gün də erməni ruhaniləri arasında çoxlu sayda əski KQB-nin ştatlı zabitləri və gizli məlumatlandırıcılar olub və var. Yeri gəlmişkən, Moskvadakı ermənipərəst dairələr çoxsaylı intriqalar və təxribatları məhz onların əlləri ilə həyata keçiriblər. Bu günə qədər Moskva bu xəstəlikdən qurtula bilmir, daha doğrusu, bunu istəmir.

Mariya Zaxarova Heydər Əliyevə hörmətsizlik etdi | VİDEO

İkincisi, xanım Zaxarova hisslərində çox səmimidirsə, onda bu sahədə ən yaxşı nümunə Sovet dövründə böyük çətinliklə KQB podpolkovniki rütbəsinə yüksələn hazırkı Rusiya prezidenti Vladimir Putinin adını çəkə bilərdi. Putinin özünün sözlərinə görə, 1980-ci illərin ikinci yarısında Şərqi Almaniyanın Drezden şəhərində yaşayanda sovet kəşfiyyatının rezidenti kimi “adi kəşfiyyat fəaliyyəti: mənbələrin cəlb edilməsi, məlumatın əldə edilməsi, emalı və mərkəzə göndərilməsi” ilə məşğul olub. Beləliklə, müəyyən strukturlarda yerləşmiş KQB agentlərinə gəldikdə, bu nümunə daha məntiqlidir.

Üçüncüsü, qəribə bir “təsadüf” nəticəsində Mariya Zaxarovanın sonuncu uğursuz açıqlaması, Moskvanın AZAL sərnişin təyyarəsinin vurulmasına görə məsuliyyətini inkar etmək cəhdi və Yekaterinburqda saxlanılarkən insanların ölümünə səbəb olan azərbaycanlılara qarşı qəddar rəftar səbəbindən Azərbaycan-Rusiya münasibətlərində ciddi fikir ayrılıqlarının həlli üçün kövrək bir ümidin yaranması ilə üst-üstə düşüb.

Bu kontekstdə, Mariya Zaxarovanın son “təfəkkür incisi”, Moskvanı erməniçilik ideoloqlarının maraqlarının girovuna çevirmək məqsədi ilə özünün Rusiya XİN-dəki erməni diasporuna nüfuz etdiyi təəssüratını yaradır. Əslində, Rusiya diplomatiyasının rəhbəri Sergey Lavrovun onun damarlarında “erməni qanı”nın axdığını qürurla bəyan etməsini nəzərə alsaq, bu, heç də təəccüblü görünmür.

Yeri gəlmişkən, xanım Zaxarovanın son “təfəkkür mirvarisi” fonunda 2023-cü ilin oktyabr ayında onu “şmara (sərxoş pozğun qadın)” adlandıran siyasi analitik Yevgeni Satanovskinin tənqidini xatırlamaq yerinə düşür.

Sahil İsgəndərov, politoloq
AzVision.az