Macarıstan Beynəlxalq Cinayət Məhkəməsindən çıxıb

“Bu qərarla biz qərəzsizliyini və nüfuzunu itirmiş, siyasiləşmiş qurumun bir hissəsi olmaqdan imtina edirik”, - Macarıstan XİN-in rəhbəri “X” sosial şəbəkəsində paylaşım edib.
Macarıstan hökuməti BCM-dən çıxmaq üçün parlamentə qanun layihəsini aprelin 3-də təqdim edib. Bufapeşt, BCM-in İsrailin baş naziri Benyamin Netanyahunun həbsinə order verməsindən sonra belə bir qərara gəlib. Məhkəmənin orderinə məhəl qoymayan Netanyahu məhz aprelin 3-də Budapeştə səfər edib. Macarıstan hökumətinin fikrincə, BCM “yalnız özünü deyil, bütün beynəlxalq sistemi gözdən salıb”.
Qanun layihəsinin qəbulundan sonra, Macarıstan BCM-dən çıxması barədə BMT-ni xəbərdar etməlidir. Beynəlxalq hüquqa görə, qərar bir ildən sonra qüvvəyə minəcək.
Qeyd edək ki, son vaxtlar qlobal miqyasda BCM-in nüfuzu devalvasiyaya məruz qalıb ki, bunun da əsas səbəbi qurumun analoji mahiyyət daşıyan hadisələrlə bağlı adətən selektiv qərarlar çıxarmasıdır. Məhz bu baxımdan, əksər dövlətlər və analitiklər BCM-i siyasi təzyiq alətinə çevrilmiş bir qurum kimi qiymətləndirirlər.
Yeri gəlmişkən, ABŞ və Rusiya BCM-in təməl prinsipi olan Roma Statutunu qəbul etməyiblər.
Sahil İsgəndərov
AzVision.az
Teqlər: Macarıstan BCM